特首梁振英太太梁唐青儀最為市民熟識嘅，除咗係同囡囡齊昕關係唔多好兼被掌摑外，不得不提佢之前出席一個活動時着上紅色晚禮服，被封為「人形龍蝦」，難得梁太唔介意網民笑佢，早前坦承愛食「龍蝦伊麵」，呢番自嘲反而令人讚佢睇得開！
噚日新東補選，梁太都有出動，但佢住喺禮賓府，唔係新東選民，當然唔係去投票，而係出席香港各界婦女聯合協進會舉辦嘅「2016年春節聯歡大會」。由於都係新年喜慶嘢，所以梁太都一身紅色刺繡衫出席，同穿上棗紅色套裝裙嘅基本法委員會副主任梁愛詩不知幾咁好傾。唔知呢兩位女士，有冇交換下穿衣之道呢？