睇財務報表又好，致股東的信都好，總是對住一堆堆納悶嘅數字。不過，每年讀畢菲特致投資者的信卻年年有錢落袋，發覺字裏行間並非只有黑同白，今年仲領略股神打「真情牌」嘅智慧。
畢菲特為巴郡撰寫第51封致股東的信也是講政治。適逢今年美國大選年，作為美國大好友嘅畢菲特，話毋須對美國經濟過份悲觀，對此睇法不感意外。反而信中最令我印象深刻係股神於大是大非前點樣發聲。畢菲特沒有擺出高姿態，說明某某不是，但運用數據提出反駁論點。信中提到目前美國出世嘅嬰兒係歷來最幸運的一群，現時美國人均GDP約5.6萬美元，為股神1930年出世時嘅6倍。當然你可以話畢菲特位處全美最富裕嘅1%，中產同基層民眾面對實質難題，真係知條鐵。同時畢菲特早表明支持民主黨總統候選人希拉莉。不過，我信股神眼睛是雪亮的，佢只係想曲線抽擊一啲只嗌口號、令選民對美國經濟產生恐懼嘅選舉心理戰術。講到底，美國人係揀總統，而非marketing manager。
香港近排多人話想聽到官員講多啲「人話」，唔好咁離地。其實想做到貼近民情，就要領袖嘅謙遜態度成就。香港財爺喺新預算案贏到不少掌聲，讚佢顯示「真．本土情」。
Captain Cool
本欄逢周一刊出