唔少新界東街坊噚日喺區內，一定見到各新東補選候選人嘅助選團出沒，就咁憑目測，肯定發現公民黨「岳少」楊岳橋同本民前梁天琦嘅助選團較年輕，八方更發現，兩大陣營都有美少女助選團，楊岳橋助選陣營中有位「翻版謝安琪」，吸到唔少市民目光；「滑鼠娘娘」則黑絲登場，街頭叫咪幫梁天琦拉票！
Tracy怕醜 娘娘冒寒叫咪
今年22歲、就讀樹仁大學工商管理系4年級嘅Tracy，噚日全日為楊岳橋助選。由於生得標致，引起唔少人注意。八方問過Tracy，佢原來正在公民黨實習，佢話喺楊岳橋身上學到好多待人接物之道，又覺得佢為人正直、永不放棄，兼且好相信自己嘅原則，非常希望佢當選。
訪問期間，貌似阿Kay謝安琪嘅Tracy好怕醜，幾度面紅，掩面微笑。佢話估計畢業後會從商，加入商業機構工作，今次希望透過實習，感受選舉氣氛。
喺少女支持度方面，梁天琦都唔弱喎，滑鼠娘娘鄺頌晴噚日亦一朝早去到將軍澳幫佢手。打扮非常平實嘅佢，打上黑框眼鏡，着住黑絲登場，見佢棟篤企喺街頭，寒風中攞住大聲公為梁天琦叫咪拉票，真係我見猶憐，唔知美少女兵團，有冇催票作用？
李八方
mailto:[email protected]