雖然大市氣氛有所改善，但近半年恒指假突破多，每逢大家有番少少信心時，就有大戶出嚟掟貨，呢一刻幾難分辨大戶係震倉定係想低位收貨，與其狗衝，不如留意多啲潛力殼股或長線好股。
長線好股除咗舜宇光學（2382）之外，下一隻就係中國燃氣（384）。個幾月前，中國燃氣發公告表示，截至今年1月22日，中燃嘅外幣債務佔總債務比率，降到7.4%，相比2015年3月底嘅82.7%，大大降低。
中燃管理層解釋，佢哋減持外幣債，主要係降低滙率風險，並唔係因為估計人民幣滙價會繼續貶值。
以上兩個舉動，尤其用不足一年時間大幅降低外幣債嘅比例，令晉佳有唔錯嘅印象，原因不在於中燃係咪睇中人仔滙價走勢，而係可短期內作出咁大改動，間公司必然有靈活變通嘅決策過程，呢一點，莫講話國企，民企亦難以做得到。
相對於其他燃氣股，多數都係決策過程緩慢嘅國企，中央唔掂一定要捐軀救國。國企究竟要點樣為中央犧牲，遠嘅唔講，近嘅就有中車（1766）喺人仔滙價跌浪之中，增加美元債，除咗海外業務需要之外，亦唔排除方便中車將更多手上美元調回偉大祖國，兌番人民幣，等人行有更多外滙儲備抗外國勢力。另一邊廂嘅中燃冇包袱，自然有優勢。
晉佳
https://www.facebook.com/advanceguy1/