上星期行經中環荷李活道，發現一間唔多起眼嘅日本拉麵店，老實講，香港地嘅拉麵店多如天上繁星，間間都差唔多，原本都冇乜興趣，不過透過櫥窗見到裏面有部大電視播住日本拉麵節目，忽然覺得好有日本feel，於是好奇入去試番碗麵。
一行入去就聞到一陣海鮮湯味，原來呢間係日本築地人氣拉麵店嘅海外分店，賣點就係以鮮蝦熬湯，配自家製拉麵，上月來港開首家海外分店。試咗一碗叉燒筍干拉麵（90元），蝦湯的確相當鮮味，麵條亦好有咬口，不過略嫌味濃，偏鹹，食完好想飲凍可樂。
翻閱資料，話呢間店喺日本，每碗招牌蝦湯用上50隻甜蝦去熬製，來到香港加到70隻，做法係將蝦頭烤香之後，再放入豬骨、豬蹄等材料，再逐步慢熬成蝦湯，最後加入紅葱頭、蝦頭等炸成嘅蝦油，難怪做到「一室蝦香」喇。