噚日係民主黨南區區議員區諾軒嘅大日子，因為小登科嘅佢繼前日下午設宴招待政圈友好外，噚晚則喺中大擺酒，主要宴請親朋戚友。但作為新東選民，噚日佢為咗撐公民黨楊岳橋，着住禮服嘅呢對新人，特別喺擺酒前到駿景園票站投票（圖）。而前日宴會來賓都好多，除咗社運中人如學民黃之鋒、周庭，以及民主黨楊森同甘乃威等，中大校長沈祖堯都有出席。為佢證婚嘅何俊仁，更喺財委會審議高鐵撥款嘅拉布戰中途趕至。到咗錫新娘環節，台下都不停大叫拉布，擔任司儀嘅民主黨南區區議員柴文瀚都話，未見過會錫咁耐㗎喎。