耀才（1428）做紅娘！做過大台娛樂主播嘅耀才財經台靚女主播謝美琪（Mag），上周六披嫁衣，新郎哥係同事、耀才助理分區經理馮梓維（Harvey），老闆葉茂林因事忙冇去飲，但大利是照送到。
Mag係浸大傳理系畢業，有超過10年主持同主播經驗，加入咗耀才超過4年，老公Harvey就做咗8年，一個長駐中環總公司，一個管分行，原本要唱句「你我相隔多麼遠」，但緣份天注定，兩人喺公司嘅大型活動湊巧遇上，並一拍即合，拍拖兩年幾就拉埋天窗。
佢哋前晚喺港島海逸君綽酒店舉行婚宴，筵開32席，負責財經台嘅耀才市務總監郭思治，仲有公司兩位行政總裁陳啟峰與許繹彬都有出席，單計耀才同事已經接近7圍，好似公司晚宴咁熱鬧。恭喜晒。