練馬師大摩愛將之一貝湯美，周日(28日)又來香港客串一期，近日湯美仔手風超順，曾在悉尼玫瑰崗馬場食大四喜，周日本港第十場三班1400米嘅「人民武士」，便將由湯美仔操刀。
呢匹身價逾600萬港元嘅田北俊議員愛駒，上仗增程初跑1600米，結果只得尾二，對3歲馬嚟講可能暫時未太合適，輸蝕氣量。今次縮番落贏馬路程1400米，換上騎過一次即獲亞軍嘅湯美仔，大摩預期表現會完全唔同。
大摩說：「大家一定要忘記『人民武士』上場嘅表現，上場唔係真輸，佢受形勢所限，逼住留後，點知遇上慢步速，跑到中段左右，已經知佢輸梗，我之後畀佢小休個幾月，家陣有番晒生氣。今場排13檔表面上好差，但貝湯美好熟隻馬嘅脾性，騎者又熟悉沙田場地，所以我唔太擔心，出閘後跟喺3至6位，應該唔難做到。」
記得「人民武士」前仗勝後，大摩話過睇得佢好高，當時揚言「人民武士」季內仲有三四場頭馬，所以上場之敗，只係偶然事件。大摩今次好信心話「人民武士」會喺直路重現強橫追勢，希望湯美仔喺香港金盃贏「威爾頓」之餘，仲可為為「人民武士」食尾糊喎！