話唔定英超嚟緊又多隊土豪！據英國《每日郵報》披露，有中東神秘富豪將會以兩億鎊（約22億港元）收購愛華頓，相信交易會喺嚟緊幾日落實。消息人士話，原本係美國財團傾收購先，但中東富豪突然出手，出價仲令球會主席簡胡禮為首嘅股東無法拒絕，但家陣係雙方交易嘅敏感時期，唔可以透露太多，最快會喺禮拜二作客阿士東維拉場波前宣佈落實。如果愛華頓新班主諗住大搞、行曼城崛起條路，相信佢哋會開高人工留住史東斯、巴克里同盧卡古呢班主將，之後再喺夏天高價買人。