噚晚嘅中國超級盃，兩大土豪交鋒，廣州恒大新援積臣馬天尼斯雖然冇乜表現，不過靠列卡度高拉特梅開二度，以2:0擊敗江蘇蘇寧捧盃。至於中超轉會窗喺上周五關閉，冇乜震驚交易喺轉會煞科日發生。總結呢個冬季轉會窗，中超使咗3.34億歐元（約28億港元），係買人開支最多嘅聯賽，領先第二位嘅英超成8,000萬歐元。買人使費最多嘅球會係用咗成億歐元嘅江蘇蘇寧，而標王亦係嚟自蘇寧，佢哋以5,000萬歐元由薩克達簽入阿歷士泰斯拿。