上集介紹了牛奶公司位於薄扶林的牧場遺址，從山谷遺留的圍牆、牛欄、豬欄、橋墩、草廬等，可以想像那裡曾經有一個具相當規模的牧場。雖然牧場的昔日面貌不再，但薄扶林村村民仍然對當年「風吹草低見乳牛」的生活念念不忘。
記者：張寶晶 攝影：李錦鏵、伍嘉亮、朱家駿
薄扶林村文化環境保育小組成員徐柱君（Steven），自小在薄扶林村長大，五、六歲時，曾經跟隨村內的哥哥姐姐到牧場玩。山坡長滿洋草（即象草，用以餵飼牛隻），他們總愛跑到山頂，坐在隨身帶備的紙皮或瓦通紙上「滑草」，「就好似坐住個雪橇咁，喺山頂滑落嚟！真係好百厭㗎嗰陣時，但係好玩㗎！」
人稱「朱老闆」的吳江乾，在薄扶林村住了50多年。七、八歲開始，他便經常與朋友結伴，放學後跑到牛房玩。牛房外的圍欄很高，他們都要偷偷摸摸，互相把風，合力攀過去。「入到去牛房，就摘啲草嚟餵牛。有啲朋友就鍾意騎牛牛，我都有。」談起在牧場的童年回憶，朱老闆立刻眉飛色舞。
來到牧場牛房，怎少得擠牛奶來喝？朱老闆與朋友更會帶備漱口盅來盛載牛奶，「不過，你受唔到會搞到肚痾！哈哈哈！」偷喝新鮮牛奶會肚瀉實屬正常 ——皆因牧場生產的牛奶，進瓶前其實要消毒。今年76歲的薄扶林村村民雷太可謂最識飲識食了，不但會用從牛房偷偷擠來的牛奶煲糖水，更會用來炮製她最愛的「牛奶Risotto」，「將啲米洗乾淨，再將牛奶倒入去煲飯，香，好香！」
由八歲開始，雷太就在牛奶公司宿舍生活，當年不時都會從窗外聽到牛叫，甚至看過小母牛的誔生，「生呀生出嚟，嗰個牛仔就跌落地下，踩幾踩咁又跌呀，然後就企高，好生猛，一生咗出嚟就曉企，好得意㗎囉！」
當年牛奶公司請了千多人管理牧場，由煮飯洗衫，擠奶餵草，到獸醫助理都有，當中不少更是住在附近的薄扶林村村民。雷太的父母都是牧場員工，一個管車，一個餵豬。她說，偶爾媽媽病倒了，她也要幫忙拾豬糞，清潔豬欄，割草餵豬，「搞糠呀，搞到一盤咁倒落去，啲豬就會擁埋嚟食。」之後，雷太更認識了當時負責組裝雪糕車的雷生，「嗰陣宿舍有一塊空地打麻將，咪識到佢囉，啱嘞，情投意合，咪結婚囉。」說後，雷太靦腆地掩臉大笑。
1972年，置地公司收購牛奶公司，牧場逐漸荒廢，更劃成住宅用地，幾代員工、街坊的牧場生活，也在1983年隨著牧場正式關閉，劃上句號。「以前呢度好靚，寧靜好多，空氣好好多，同依家唔同。」朱老闆說，從前在牧場可以看見不同種類的雀鳥，但隨著牧場消失，現在都已經不見了。「以前唔太覺得，依家回望好唔捨得。」
「一個牧場，對佢哋 (薄扶林村村民) 嚟講，係一個好珍貴嘅回憶，亦構成佢哋生活嘅一部分。」明愛薄扶林社區發展計劃團隊主任冼昭行及其團隊，打算與薄扶林村民合作，重現牛奶公司牧場的歷史及故事，想知道詳情，請留意下一集動新聞。