二月將盡，灣仔海傍，烈火青春。
獎牌滿地，紀錄橫飛，周街X連霸，勝固可喜，但印象中青蔥歲月嘅難忘回憶，總係要同遺憾扯上關係，正如《奧斯卡》有幾何係喜劇攞獎吖。
鏡頭一轉，去番一年前嘅D1，當時有位巴基斯坦裔嘅型仔AJ（左），晌400同800米都破晒紀錄入決賽，點不知去到決賽只差一點點，兩項都屈居亞軍，最慘嘅係單天都保唔到母校，仲要降落D2㖭，聖瑪加利師生只能同聲一哭。
如此同時，余記平地爆出咗中距離好手大隻權（右），傳聞佢某日上堂瞌瞌吓眼瞓，一瞓醒就發奮又咪書又練跑，好似《功夫》入面周星馳嘅任督二脈突然被火雲邪神幾拳打通咗咁，曉飛一樣，結果大隻權橫空攞咗800同1,500兩個金牌。
回到冷風吹嘅今年，話說大隻權已經晉身香港隊，鋒芒已露。決賽日佢要跑三槍，護級靠你啦，上晝第一槍800，大隻權又破紀錄，但只係由頭帶咗700米，臨尾輸咗半秒。下晝第二槍，今次佢決定忍住唔帶頭，直到最後一個圈，過頭啦，又破紀錄，但又係第二，臨尾100又畀對手過番頭，雙冠變雙亞。最後一槍，4x400旨在盡力完成，大隻權最後一個接棒，力已盡筋已抽，跌低起番身捱番終點，晌對手背脊都見唔到之下，完成咗佢嘅最後一場D1賽事。諗住慰問吓佢，點知大隻權笑笑口話：「跌低咗咪起身再跑過囉！」一年前後，連講嘢都叻咗。與此同時，落咗D2嘅聖瑪加利，終於又萬眾一心攞番冠軍下年上番D1，攞兩金嘅AJ功成身退。
邊個先係主角呢其實？睇吓邊個係你個仔啦，或者你讀邊間學校啦，又或者係套戲幾時完啦！一日唔嗌cut，你都仲係叫緊糊，而可以嗌cut嗰位唔係導演，係你自己！
KEYMAN
節目主持