日聯噚日開鑼，慣咗喺禮拜六、日晏晝賭餐下午茶嘅朋友又多個選擇，但衞冕嘅廣島三箭相當令捧場客失望。明明佢哋之前喺日超盃贏得有霸氣，但嚟到聯賽主場對川崎前鋒唔單止冇波入，臨尾仲失波輸0:1。
佐藤美希到場打氣
賽會方面都好重視呢場三箭對前鋒嘅比賽，派咗「特命公關部女子經理人」、即係類似代言人嘅佐藤美希去做直擊報道。雖然佐藤美希包到實晒，冇喺球場一騷佢嘅F Cup身材，但佢咁正都迷倒唔少男球迷。講番場波，三箭有主場之利之餘，喺月中嘅日超盃仲以3:1輕取大阪飛腳，所以莊家都睇好佢哋贏前鋒。三箭派咗老牌射手佐藤壽人擔正，茶島雄介同柴崎晃誠做後上中場，協助攻堅。不過，三箭攻極都攻唔入，喺82分鐘換埋外援彼得烏達卡入場博一博。呢位尼日利亞射手以前踢過中超，佢哥哥約翰烏達卡仲出名，以前踢過英超嘅樸茨茅夫。不過，彼得烏達卡腳頭真係差，入場兩分鐘，三箭就失波。川崎前鋒小林悠喺小禁區頂冇人防守，接應左路傳中射入，為前鋒一箭定江山，鎖定贏1:0。
唉，三箭啲後衞太失策嘞，小林悠係開「咧」戰入球王，計埋呢次，已經連續三季喺開季第一場聯賽入波。至於另一支爭標熱門浦和紅鑽就旗開得勝，作客贏咗柏雷素爾2:1。