NBA上周五上演東岸榜首大戰，速龍憑「肥仔嘜」後衞洛利（Kyle Lowry）刷新個人新高43分兼使出絕殺，主場以99:97險勝騎士，主場10連勝之餘，追到只落後騎士兩場勝差，有望挑戰東岸一哥地位。
追至兩場勝差
騎士頭三節都領先主隊，不過喺第四節洛利同T羅斯（Terrence Ross）頻頻搶分，最後51秒洛利命中兩分，追成97平手，之後騎士嘅JR史密夫射失三分波，造就速龍反勝機會，結果洛利喺最後3.8秒跳射得手，加上勒邦占士（LeBron James）錯失最後三分波機會，速龍以兩分險勝，取得四連勝。洛利全場攻入43分，刷新個人新高，亦係騎士自2014年三月以嚟首場被對手單一球員攻入43分或以上。洛利賽後話：「今仗證明己隊已經成長，我哋係一支不斷進步嘅球隊，有能力挑戰任何對手。」騎士近五戰只得三勝兩負，雖然仍然以41勝16負排東岸榜首，但已經俾速龍追至只領先兩場勝仗，賽後更爆出內訌，前鋒路夫（Kevin Love）不滿唔被重視，咁搞法隨時一哥地位不保。