車路士搵意大利國家隊教練干地接任下季領隊，似乎都係公開嘅秘密。英國傳媒報道，身為車仔班主阿巴莫域治嘅副手格拉諾夫斯卡娃，上周五就同干地見面，干地亦都接受三年600萬鎊年薪嘅合約。一朝天子一朝臣，干地有佢嘅新兵目標，仲將矛頭指向之前執教嘅祖雲達斯，除咗星級中場保羅普巴多人爭，仲會回收番今季季初俾摩連奴兜走嘅哥倫比亞翼鋒古達度。至於車仔隊長泰利就喺佢個人社交網站上，大晒咁多年嚟收集嘅波衫、獎盃同喼帽。