周日(28日)重頭戲之一，包括第六場2000米一級賽香港金盃，方廐「軍事出擊」是2013、2014年兩屆金盃盟主，如果今屆又贏，將是繼前馬王「翠河」後，第二匹能夠贏到三屆金盃的賽駒。
潘頓表示「軍事出擊」前仗在他胯下跑香港盃一役只得第六，令他好失望，因為馬兒末段未能交出昔日凌厲的竄勁，他擔心這匹八歲馬戰鬥力大不如前。不過潘頓又補充，睇番「軍事出擊」上場在蘇兆輝胯下出戰董事盃，末段追得唔錯，早前潘頓重新接手快跳，感覺佢有番朝氣，令騎者重燃希望喎。而潘頓認為今場金盃以「將男」對「軍事出擊」最具威脅。
講開「軍事出擊」，才女馬主梁芷珊的團體馬「點解」日前由蘇保羅轉投方嘉柏馬房。梁芷珊解釋蘇廐二班馬太多，好多時「點解」被列為後備，未能上陣，蘇保羅明白梁芷珊和其他團體成員均很緊張該駒，希望馬兒有更多出賽機會，因此對馬主們拉倉決定予以理解。梁芷珊強調她和蘇保羅仍然是好朋友，沒有鬧交，旗下「競技英雄」仍會繼續留在蘇廐。
「點解」上季在蘇廐三捷，但今季在蘇廐未贏過，其中前仗得季軍，只不敵「澳斯卡」、「有得威」。而「點解」轉投方嘉柏後，將與同主馬「文藝復興」同廐。