轉機，大概是旅行中最無聊一環。最慘是遇上時間唔長唔短，等又耐，出境又唔夠時間，焗住要在轉機區等。所以你見杜拜、新加坡這類熱門中轉站，深宵仍然有好多旅客，在food court眼光光呆坐。猶幸近年多了機場眷顧這班無聊人，比如新加坡機場的轉機站就出名多嘢玩，由兒童遊樂場，到有電影、MTV睇，有Xbox、PS玩的遊樂區，隨時樂而忘返到唔記得上機。
最近機場設施再upgrade，轉機酒店Aerotel Singapore於裝修後重新開幕，直接設於T1的禁區裏面，就近閘口，瞓到最後一刻先上機都得。房靚不在話下，這裏更是全球第一間有泳池、按摩池與健身室的轉機酒店，等飛機不再是悶蛋事。最少入住6小時，往後按每小時計，收費由SGD$55（約304港元）起。隨着國際航運越見頻繁，旅客對轉機住宿要求亦提高，目前阿布扎比及倫敦機場，已有興建豪華轉機酒店的計劃，未來或成趨勢。
Aerotel Singapore
地址：新加坡樟宜機場T1三樓41號閘口附近
facebook：Aerotel Airport Transit Hotel
記者：甄俊宇
圖片：Aerotel Singapore
