立法會內務委員會昨就是否針對初一旺角警民衝突引用「特權法」成立專責委員會調查事件，特首梁振英喺事發後已一馬當先將事件定性為「暴動」，建制派議員當然反對調查事件啦。民建聯元秋蔣麗芸噚日在會上發言，話梁特已經責成保安局徹查事件，又話刑事程序又未完成，𠵱家要立法會成立專責委員會係言之過早，分分鐘仲會妨礙司法公正，又話不少泛民在佔領期間被捕，𠵱家成立專責委員會查警方係咪有利益衝突。
聽完元秋「偉論」，社民連梁國雄忍唔住講咗句「白癡」，元秋即時撻着，大鬧長毛：「你就白癡，將你繩之於法。」兩個人你一句、我一句，呢個時候人民力量陳偉業竟唔識死加把嘴，叫內會主席梁君彥裁決邊個先係白癡，元秋轉向陳發炮，怒轟：「關你乜事呀，八公！」