下月9日又有日全食睇喇，雖然今次要喺印尼先睇到日全食，但香港都睇到日偏食。當日嘅日偏食會喺早上8點05分開始，9時57分結束，過程約兩個鐘，最明顯嘅食甚時分，會出現於早上8點58分。
太空館館長梁偉明話，今次會睇到太陽俾月球遮咗四分之一，唔算太明顯，加上3月仲係春季，天氣潮濕多霧，仲未知到時睇唔睇得清楚。
香港對上一次睇到日偏食係2010年1月15日，如果錯過今次，就要等3年後，即係2019年12月26日。梁偉明話，今次日食發生時太陽仰角比較高，所以香港大部份地方，只要面向東南偏東方無障礙物，都會觀賞到日偏食。