【新東補選】
【本報訊】今次立法會新界東補選，除已變成一場是非保皇與建制派之爭，更加是一場港人對特首梁振英施政不滿的表態，上屆立法會選舉新界東票王梁國雄說，泛民支持者要守住公民黨楊岳橋這一票，全因一旦民建聯周浩鼎勝出，就會為梁振英向北京爭取連任提供政治本錢，直言「周浩鼎勝，就是梁振英贏」，所以不滿梁的市民，一定要支持楊岳橋。
記者：王家文
支持楊岳橋，梁國雄毫無懸念，「如果今次周浩鼎贏，即係放生CY（梁振英）」。因為梁曾說要把泛民踢出議會（vote them out），若這次泛民輸掉，他便可向北京邀功，挾民意繼續鐵腕鎮壓、反拉布，「畀佢上去北京攞政治本錢連任」。周浩鼎勝，就是梁振英贏，「我哋真係對唔住投票畀我哋反對CY嘅人」，這名新界東票王說。
新東補選後，就是中共兩會，特首梁振英「面聖」、向國家主席習近平匯報治港政績，「你估佢（梁振英）去兩會講乜？『嗱，我（梁振英）都話㗎啦，本土派同泛民都係冇用，輸咗畀我哋周浩鼎』」。這次新東補選正是再一次彰顯民意，是非保皇跟建制派對陣，「如果周浩鼎輸咗，佢點解釋？解釋唔到」。所以他支持楊岳橋，「一個人淨係諗自己，係諗唔到其他嘢，個個人都係，包括我在內」。
民主黨及公民黨於2011年曾支持立法會修改議事規則，擴大小組委員會主席的權力，容許驅逐行為不檢的議員。梁國雄沒有忘記，「我記得，但𠵱家公民黨改咗，佢都唔贊成，你係根據過去定𠵱家做人？」今次補選也關乎修改議事規則，「周浩鼎選到有機會修改，無論機會幾細都好，都有機會，佢選唔到，係完全冇機會」。
對有人指支持本土民主前線梁天琦，是買一個希望，長毛反駁這個說法：「如果出現我講嘅情況（周浩鼎勝），唔知佢哋個希望喺邊度。」
不過支持梁天琦的青年新政召集人梁頌恆仍堅持，他們的選擇是買一個希望，但梁頌恆也承認，上屆新界東立法會選舉，泛民奪逾24萬票，建制派約16萬票，若梁楊爭票，變相保送周浩鼎，可是梁頌恆認為，就算梁天琦暫停所有競選活動，採取棄保式打法，也不代表梁的支持者，會改為支持楊岳橋。
梁頌恆又說，在他眼中公民黨是恰如其分的政黨，但他認為在現時政局下，「恰如其分係唔足以為我哋改變任何嘢，呢個都係大家必須接受嘅現實」。誠如楊岳橋的競選口號，守住一票；梁天琦政綱則是主攻，「一個進攻同防守嘅分別，一個減慢輸嘅速度，對我哋冇意義，因為我哋捱唔到去2047年」。
新東補選候選人尚有方國珊、黃成智、梁思豪及劉志成。
