浸大昨喺校長宿舍紹邦樓搞新春傳媒茶敍，傳媒除咗關心大學發展，都想知錢大康呢位新校長閒時嘅嗜好。八方睇到角落擺咗兩部單車，原來正是錢大康嘅「破風戰車」，但乜解究一人踩兩部呢？
一問之下，錢大康「單車經」講唔停，話一部係Mountain Bike（登山單車）、一部係Road Bike（公路車），佢話踩咗10年，有時喺屋企附近踩，嫌悶就同單車友由上水踩去羅湖，再返天水圍落屯門，閒閒哋都60公里。
六十幾歲嘅佢話現時仲踩到斜路，不過東涌上天壇大佛呢段幾公里嘅斜路，仲未挑戰到喎，聽到八方同一班行家嘩嘩聲。但佢話踩到攰都唔勉強嘅，叫電召貨車送佢同戰車返屋企囉。