喺廿年前嘅一個暑假，有位老死拉我落去證券行睇股票報價，向我介紹一隻叫良記集團（現稱優派能源，編號307）嘅股票。喺嗰一刻，我覺得要從股票贏錢，就必先認識股票，所以買咗份報紙，睇第一個專欄就係《投資者日記》。
嗰個年代，如果睇林行止係為咗認識經濟，睇曹Sir一定係為買股票，我每日都會細心咀嚼，如是者由中學睇到大學，大學睇到社會大學；買股票嘅啟蒙老師，一定係曹Sir。
前幾年，因為工作關係，有機會同自己老師共晉午餐。佢人生大部份時間貢獻畀傳媒，即使轉咗搞基金、炒股票，但眼前嘅佢，風骨依舊。當時佢分享嘅已經唔係股票秘笈，而係佢講之不盡嘅故事，同埋對於香港前途嘅睇法，全部係鮮為人知又帶點筆墨形容唔到嘅道理。我冇諗過，一頓午餐，一位老人家講嘅往事，我今日仲可以記得咁多、咁清晰。
敬佩老師，最好保持一段距離，或許食一餐飯嘅距離就剛剛好，否則曹Sir對住我呢個冇慧根嘅學生，佢一定火都嚟。亦因為咁，其後我很少搵佢，後期佢身體唔好，我更加唔打擾佢。食完飯後，與一眾同僚行到嚟，講一聲「bye bye」，佢就背向我哋，舉起右手，揮一揮，就係呢個shot，用股神形容佢，太膚淺，咁神嘅人，就是這樣煉成，然後佢隨風離去。再見。
晉佳
https://www.facebook.com/advanceguy1/