財爺曾俊華前日發表紅噹噹預算案後，噚日朝出席立法會財委會講解預算案時，多達4名女議員突然以利是封造型現身，包括白鴿黨主席劉慧卿、民建聯主席李慧琼、元秋蔣麗芸同前日狂寸鬍鬚曾嘅葉劉。葉劉話着得咁紅，因為晚上要出席白鴿黨黨慶咋。
前日爆seed嘅葉劉，噚日席上未有機會提問，因為佢遲咗近15分鐘先到場。期間3個「紅」娘葉劉、李慧琼、元秋密斟，至會議中段，葉劉提早近一小時離場。葉劉噚日唯一向財爺發炮機會，係喺慢必發言引述佢前日鬧曾俊華賣口乖期間，順勢加把口話港人真係「好受𠱁」，慢必就話，「可惜香港好多官員連賣口乖都唔做」囉。