Happy Birthday！民主黨今年21歲生日，噚晚喺尖沙嘴一酒店筵開36席慶祝。多得立法會周三點錯人數流錯會，令生日派對唔使喺點人數拉布戰壓力下舉行，好多來賓都非常盡興。政制及內地事務局局長譚志源都現身，話係代表梁班子到場祝賀。白鴿黨友渾身解數，加埋買枱同拍賣，籌到成760萬善款。
酒會噚日6點半舉行，譚志源冇耐就現身成為特別嘉賓。乜梁班子今年唔落令杯葛咩？譚志源自稱代表政府出席，仲同白鴿友selfie；佢其後透露問責團隊同特首開會後決定派佢做代表，笑稱「物輕情意重」，指政府其實喺唔少地方同民主黨「有偈傾」，珍惜任何溝通機會。
籌近800萬捐款
行會成員羅范椒芬都有現身，但冇留低晚飯；其他政界重量級人馬如前政務司司長陳方安生及自由黨榮譽主席田北俊等都有捧場，《蘋果日報》社長葉一堅亦出席同白鴿黨人舉杯賀壽。主席卿姐致辭時引述唔少嘉賓話香港好難有個政黨維持達21年，強調會趁21周年反思如何做得更好，年輕一代會帶領民主黨迎向未來，繼續維護香港核心價值。
晚會當然唔少得娛賓表演。專責黨慶籌款嘅李華明率先上台開金口；民主黨全體議員其後則請陳太、田少、梁家傑同盛智文等上台合唱《獅子山下》。乳鴿仔則以一曲《抗戰20年》向3位即將離任嘅立法會議員包括卿姐、何俊仁同單仲偕致謝，3人更即場進行「金盆洗手」儀式㖭。田少欲罷不能，其後再上台話代表「超然的人」點唱，要求同上述3人合唱《沉默是金》，笑指佢哋之後可以一如歌詞「灑脫地做人」。
上年都有到場支持嘅港鐵主席馬時亨身在加拿大，今年人不到禮到，捐款10萬要乳鴿仔向卿姐獻唱，另以10萬蚊投咗田少捐出嘅紅酒。盛智文捐10萬叫卿姐、黃碧雲、朱耀明同胡志偉獻唱近日hit爆嘅《憑着愛》。6樽由卿姐悉心炮製嘅醉雞（圖），每樽以1萬5千蚊全數售出，連同唔少有心人如恒地黃浩明捐出嘅紅酒、買枱以及其他匿名人士捐贈，民主黨噚晚籌到760萬蚊，多過去年300萬蚊一倍有多，加上捐款陸續有來，同800萬籌款目標好近。李華明透露詹培忠都無條件捐咗50萬。
李八方
mailto:[email protected]
