所謂新人事新作風，馬時亨上月正式擔任港鐵（066）主席之後，除咗銳意改善公司形象，𠵱家連掌櫃都換埋。港鐵噚日宣佈，委任53歲嘅許亮華做財務總監（CFO），接替三年任期屆滿嘅羅卓堅，今年7月生效。
港鐵今次係向呂志和旗下嘉華國際（173）挖角，搞到呂志和𠵱家要周圍搵人嘞。不過又咁講，許亮華算係回巢，事關佢2004至2011年曾擔任港鐵企業財務總經理，之後過檔神州數碼（861）兩年，跟住就去咗嘉華。
由於許亮華喺嘉華唔係董事，所以翻閱年報睇唔到佢幾錢人工，港鐵就畀佢基本年薪454萬元，另加花紅、獎勵股份等等。
佢投行出身，畢業後先後喺摩根士丹利、獲多利（後改稱滙豐企業銀行）工作多年，有投行背景，應付芬佬得心應手喇。