港姐同人唔同命！陳凱琳獲無綫力捧兼有小生男友鄭嘉穎，幾乎部部劇都擔正女主角，蔡思貝就算被爆涉假學歷，依然坐穩無綫女一的地位，相反，2012年港姐季軍朱千雪雖畢業於名校西門菲莎大學，卻被兩師妹迎頭趕上，有雜誌指朱千雪不甘被無綫冷待，請假一年到中大進修企業傳播管理碩士，叠埋心水鋪路轉行。
報道指朱千雪縱使被網友封為「民選冠軍」，卻不及陳凱琳和蔡思貝獲公司重用，有份拍攝的劇集多是配角或客串，令她心灰意冷，日前就被影到停工返學，手停口停要捱麵包充飢。昨日，讀者提供朱千雪出席學校派對相片，除下港姐包袱蹲着合照。據知，她跟無綫的合約超過5年，不可能隨便隱退或轉行，今年7月假期完結後，還是要返無綫開工拍劇，而她有份演出的劇集，亦已經排期播映。
「工作係公司安排」
被指搶去朱千雪工作的陳凱琳和蔡思貝，昨晚現身灣仔出席皮草活動，陳凱琳強調跟朱千雪是好朋友：「好支持佢讀書，替佢高興可以讀到鍾意科目。」問工作量是否多了？她說：「自己唔清楚，工作量公司會安排，相信冇衝突。」問到最近有否聯絡？她說：「佢忙考試，但有睇佢新劇，同佢講做得好好。」至於傳朱千雪會轉行，她說：「尊重每個人決定。」
蔡思貝性感谷胸亮相，對於搶工作傳聞說：「自己都唔清楚，工作係公司安排，都冇特別多咗，都係正常安排行騷，稍後去新西蘭拍節目，講番自己以前喺嗰度讀書嘅生活。」蔡思貝早前被爆涉假學歷，一個月讀完菲律賓比立勤國立大學學位風波未了，無綫卻安排她拍新節目講讀書生活，問到會否擔心好敏感？她尷尬說：「中學啫，3月尾出發，因為節目講我嘅讀書生活，自己要做番資料搜集。」另曾揚言收起性感的陳靜拋胸登場，大搶風頭。
採訪：曹家誠
攝影：陳慧安
