證監會有人事變動。梁鳳儀（Julia）接替退休嘅張灼華，加入證監會出任投資產品部執董，到今年3月先夠一年，即刻就要轉部門。證監會噚日宣佈，中介機構部執董施哲宏（James Shipton）3年任期，將於今年6月屆滿，之後會離開，位置由Julia頂替。
施哲宏任內，負責將「發牌科」與「中介機構監察科」，歸入新設立嘅「中介機構部」，之後再帶領部門重組。呢兩年股市好多騎呢事，唔多唔少都會增加工作量，施哲宏冇講點解只做一任就走人，可能水土不服啩！
至於本來由Julia負責嘅投資產品部，就要再請過另一位執董代替。中港基金互認、最近開綠燈嘅槓桿ETF等等，都需要由投資產品部審批。主管出缺，證監會真係要快啲請人了。其實法規執行部前執董施衛民離任後，至今都未請番人，乜真係咁難搵人？