迪士尼搞「花蛋節」？究竟係花旦，定係蛋花呀？噢，原來係3月17日起至5月29日，迪士尼樂園會有過百隻花哩花碌嘅迪士尼「花蛋」遍佈7大園區，當中超過70隻係由迪士尼朋友化身，藏身喺唔同地方，遊人根據樂園指南參與「猜猜誰．尋尋蛋」遊戲，就可以搵佢哋出嚟。
花蛋包括《玩轉腦朋友》阿樂阿愁、《怪獸公司》毛毛、《海底奇兵》MO仔，連《星球大戰》黑武士一眾主角都加入「花蛋」行列，米奇等等又會換上以香港特色為主題嘅新裝。另外，喺3月1日至7月20日，「奇妙處處通」會員可以每位$328，帶同好友入園，會員更可於3月中開始每星期到樂園換取一款珍藏版迪士尼「花蛋」，可以集齊全套㗎！