當泛民陣營畀like梁班子成員之一嘅財爺曾俊華，反而建制派對財爺都有啲大彈之時，鬍鬚曾讚社民連長毛梁國雄，又有乜咁出奇？
噚日鬍鬚曾接受議員質詢，席間唔少議員批評預算案未有着墨幫助基層市民，長毛就將示威道具「不平衡天秤」交畀鬍鬚曾，獲鬍鬚曾笑笑口話：「你手工真係越做越好。」其後鬍鬚曾發言繼續抽水，話長毛嘅手工的確有進步，但仍未能獲選入西九M+博物館喎，希望對方繼續努力。現場記者見到長毛衝前時，個天平咁啱側咗喺去長者嗰一邊，換言之，財爺做得啱啦，難怪鬍鬚曾笑笑口。長毛會後話個道具係阿牛曾健成做㗎，咁啱天平畀保安整甩咗，先至意外側咗去長者嗰邊。