新正頭過後立法會唔少人仍紅噹噹，襯晒同習握手後變身中央紅人嘅財爺，以及佢份紅色預算案，到底係咪用衣飾以示力撐財爺呢？八方唔知，只知呢片由鬍鬚曾引起嘅「赤的疑惑」驚動咗教育局局長吳克儉親自喺fb解畫。
為配合紅色封面預算案，被視為下屆特首黑馬嘅鬍鬚曾，噚日打紅黑斜紋呔宣讀預算案，好合理吖，但估唔到唔少局長都好「色」做，紛紛打紅呔撐財爺，包括直屬於佢嘅財庫局局長陳家強、商經局局長蘇錦樑，以及同係政務官出身嘅勞福局局長張建宗。除咗局長，連議員鍾國斌、張華峰都疑似以紅呔暗撐。
至於向來係梁營嘅教育局局長吳克儉，都以紅呔登場喎！八方喺即時新聞報道咗呢單嘢之後，吳得掂立即喺fb貼埋〈李八方online〉條link解畫，留言話：「其實，去年財政預算案公布當日，我都是打紅色呔！」唔通唔想俾人誤會埋咗財爺堆？無論如何，八方都多謝吳局長嘅支持。
