巴塞前晚喺歐聯16強首回合作客阿仙奴贏2:0，但拜仁慕尼黑就捉到鹿都唔識脫角，同日喺意大利鬥祖雲達斯，領先2:0下最終慘被逼和2:2，搞到教練哥迪奧拿（右一）賽後接受訪問時嬲到爆粗。
拜仁頭60分鐘好對辦，仲由湯馬士梅拿同洛賓入波而領先祖記2:0，點知尾嗰30分鐘就走晒樣，卒之畀保羅戴巴拿同史杜拿路各入一粒，慘被逼和2:2。賽後記者問哥迪奧拿係咪因為拜仁球員輕敵同唔夠氣而搞到畀祖記逼和，哥迪奧拿忍唔住爆粗，仲好寸咁話：「我唔會預期祖記冇一腳中龍，又或者我哋會踢足90分鐘好波囉。」
雖則拜仁未能喺都靈贏波，但哥迪奧拿話優勢仲喺佢哋度：「次回合大家由頭踢過，我哋揸住2:2嚟踢，0:0、1:1或者贏波都晉級；而佢哋就要贏或者3:3先有得諗。」拜仁兩個失波都關串演中堅嘅甘美治事，如果查維馬天尼斯次回合出得番，睇怕唔會再用甘美治打中堅囉。