股民下個月之後可能就要同「長和」拜拜了。不過此長和不同彼長和，今次講嘅係長和國際（009），並唔係超人嗰隻長和（001）。
話說長和國際建議改名為「九號運通」，英文名由Cheung Wo改為Nine Express，公司公佈下月18日會召開股東特別大會進行投票，獲股東通過之後就會正式改名。
其實佢改名都好嘅，之前都講過，超人旗下長實與和黃合併之後叫做長和，同呢間長和國際個名撞到啪啪聲。長和國際都算識做，主動避開，𠵱家話打算將業務作多元化發展，唔只係電影製作同物業投資，將會做埋環保熱電、地產等等，改名反映新業務云云。
不過話時話，佢改名都算懶，股票冧巴係9號，就改公司名做九號運通，唔通簡稱九運？