昨日財爺發表財政預算案，在預計盈餘為300億元下，派糖388億元，相對舊年盈餘638億元，派糖340億元，似乎鬆手咗，但有啲措施係明增實減，例如差餉寬免。與其望派糖改善生活，不如靠自己投資理財，一年之計在於春，係時候作好準備。
春天係播種嘅季節，莊稼需要播種，想添丁都需要播種，睇《公公出宮》就知啦！不過，時移世易，生活指數越來越高，添丁意欲就越來越低。睇中國遊客嘅海外搶購清單，可見一斑。
據新華社旗下《新華視點》報道，猴年春節大陸有600萬人出境過年，境外消費「刷出」900億元人民幣新紀錄。中國遊客去到外國會買乜？如果你仲以為係買幾萬元嘅首飾，或者幾千元嘅智能廁板，咁就out喇！呢個春節熱買嘅係安全套、衞生巾、感冒藥、化妝品等低價日用品。
載通純利大增無懸念
安全套唔係今時今日先上榜，難怪中國改行二孩政策後，受惠股冇乜動靜。其實中國遊客搶購嘅外國貨，都唔係中國冇嘅，只係國民對「中國製造」缺乏信心。中國遊客海外搶購清單，正揭示供給側改革嘅逼切性和路線圖。
農曆新年至今，港股成交持續偏低，本周踏入業績期，觀望氣氛濃厚，昨日更出現上周反彈以來較顯著嘅調整，恒指跌222點或1.1%，收19192點；明日期指結算，淡友或繼續屠牛。兩會將分別於3月3日及5日開幕，市場例牌炒題材股，當然唔少得具供給側改革概念嘅股份。
我對中國風險仍有戒心，寧願趁業績期吼下「準盈喜股」，心水係將於3月24日放榜嘅載通（062）。載通主要從事公共運輸服務，旗下附屬公司包括九巴、龍運巴士、路訊通（888）等，亦擁有物業發展權益。載通是油價下跌受惠股，中期業績顯示，燃油開支減39.1%，燃油開支佔收入成本亦由19.1%降至11.3%，令上半年多賺1.2倍至3.3億元。
雖然載通仲有成個月先公佈全年業績，但單計上半年盈利增幅已可發盈喜，何況下半年油價繼續跌，全年純利大增已無懸念，估計短期內會發盈喜。載通股價半年來於19.4至21.4元間上落，抗跌力強，昨收20.5元，逆市升0.5%。非執行董事伍穎梅上月21日增持，每股平均價20.616元，顯示她認為該價位仍有上升空間。董事真金白銀投信心一票，不妨候20元附近跟買。
割柑人
本欄逢周四刊出