薯片叔叔噚日講到，如果冇派糖，今年經濟最壞情況可能係負增長。佢年初發定全年預警，某程度上反映呢一刻香港嘅經濟問題唔係短期問題。2008年金融海嘯帶來嘅係剎那衝擊，今次衰退期就可能會比較漫長。
之前講到，往來香港嘅資金流將會縮減，相信對於金融同地產影響最大。好就好在，相比1998年亞洲金融風暴及2003年沙士，香港人呢一刻累積咗13年財富，同時喺買樓方面，銀行壓力測試鬼咁難meet，勉強上車嘅香港人只佔少數，供款能力偏高，而又有一批人已經差唔多供完樓，底子遠較沙士之前厚得多。
即使滙恒遲早炒人，失業率亦會上升，但有份工喺手嘅人薪水少咗，但唔會少太多，可能只會使少啲啲，對於向來服侍港人嘅中低檔次消費，未必有太大影響，甚至遇正劈租潮，同一租金搵到更靚舖位，可能仲多咗着數。
民生消費概念，大家可能諗起領展（823），不過，佢由政府做大股東，逐漸變成國企，喺大陸唔掂嘅時候，選擇進軍內地市場，對股東嚟講係揀錯時辰，對中央嚟講就係政治正確，連評級機構穆迪都話，如果領展繼續收購大陸資產，就要降佢評級。講到呢度，民生消費股當中，領展的確比較唔buy，有機會慢慢講吓揀乜股，穩陣一啲博正回報。
晉佳
https://www.facebook.com/advanceguy1/