美國超級英雄電影《蝙蝠俠對超人：正義曙光》預計今年3月尾上映，微軟創辦人蓋茨（Bill Gates）應該好期待，因為原來蓋茨係超人迷。
蓋茨與太太梅琳達（Melinda Gates）日前喺YouTube接受美國作家兼YouTube紅人John Green現場訪問，傾吓佢哋旗下基金每年發出嘅公開信，仲有基金未來目標。
期間，Green問佢哋最鍾意邊個超級英雄，蓋茨原來係鍾意超人，因超人擁有好多超能力，例如可以飛，可以睇穿牆，總之就係勁喇！而梅琳達就話鍾意神奇女俠。
之所以問蓋茨點睇超級英雄，係因為蓋茨與梅琳達基金較早前發出嘅年度公開信，提到佢哋最想擁有嘅兩種超能力係更多時間與精力。
再一次印證，有錢唔係萬能，有錢人都想自己萬能。