人紅真係多人撐，幾大商會巨頭包括香港總商會主席彭耀佳、中華總商會會長楊釗、中華出入口商會會長張學修以及中華廠商聯合會副會長吳宏斌，甚至旅發局主席林建岳，噚日都現身立法會喎，齊齊喺財爺宣讀預算案後即時回應，大讚夠務實，幫到中小企同業界等。
八方聽聞，財爺早前有邀請岳少到場支持，而佢真係百忙中抽空，可見對唐營嘅岳少嚟講，鬍鬚曾幾咁有魅力，岳少多謝預算案全力支持旅遊界，形容係雪中送炭、拋磚引玉，全面唱好。
查實自由黨榮譽主席田北俊日前先至高調撐曾俊華，有力問鼎下屆特首，仲話感覺到呢個係商界主流意見喎，話口未完，連唐營岳少都為財爺搖旗助陣，唔通佢哋都好想財爺更上一層樓？