火箭喺周二常規賽有當家球星夏登(James Harden)攻入全場最高42分,仍然難阻球隊加時以114:117輸畀爵士(白衫),賽後累積28勝29負,亦俾爵士以半場勝差反超前,暫時跌落西岸第九位。今場打足43分鐘嘅夏登賽後話:「我哋𠵱家嘅排名並唔重要,重要係球隊要喺之後常規賽打出好表現。」佢又話成班隊友已經盡晒力,希望球隊喺周四作客拓荒者嘅常規賽反底。