滙豐控股（005）因為環球業績唔靚，員工明年加人工同派花紅變成未知數，分分鐘仲累埋阿仔恒生銀行（011），搞到其他銀行嘅打工仔個個人心惶惶，怕老闆效法大行做法。創興銀行（1111）副主席梁高美懿噚日宣佈業績時就順便大派定心丸，話會加人工、出花紅，仲笑笑口咁拋出一句：「有啲大行話唔做！」
梁高美懿由滙恒出身，加盟創興之前，咪就係恒生一姐囉，所以佢肯定好明白恒生舊同事嘅感受。噚日一問到創銀會唔會加薪，佢即刻淡定預告，話銀行會出花紅、請人、加人工，平均幅度仲會追上通脹，臨尾佢加多句話：「有啲大行話唔做！」即係話大行唔做，佢哋都會照做，員工聽到阿姐咁講，肯定即刻醒神晒，今日返工都特別有朝氣呀。