立法會噚日出現香港開埠以來首次「點錯人數流錯會」，仲要發生喺港大數學系一級榮譽畢業嘅立法會主席曾鈺成身上。話說立法會破天荒喺財政預算案宣讀後繼續開會，審議俗稱網絡23條嘅《版權修訂條例》，喺其中一次點人數時，曾鈺成喺鐘聲屆滿時見到屏幕只有34人，於是宣佈流會，但事後發現在席原來係夠人，秘書處疑似將某啲議員當咗透明兼冇到，嫌疑犯係新民黨田北辰同馬逢國。秘書長陳維安其後代秘書處致歉，承諾改善點人數方法。
在場36人 屏幕顯示34人
流會案發時間係議員聽完財政預算案、飯氣攻心嘅下午4點，人力陳志全喺資訊科技界莫乃光發言時提出點人數，宣佈流會一刻，曾鈺成都有啲猶豫。佢之後受訪話當時電子屏幕上顯示34人、即係差一個人先夠法定人數，但之後問番出席嘅議員同保安，確定當時會議廳中夠晒35人。
但由於阿曾已經「吹雞完場」，會議返魂乏術，損失昨日與未來兩日共10個小時會議。商經局局長蘇錦樑透過新聞秘書回應指，對流會感失望同覺得損失時間。而今次已經係版權條例第五次流會。
點解秘書處會數錯人數？曾鈺成話秘書處點人數有一套程式，由最少兩位職員負責，一出一入都會睇住，屏幕會即時顯示，為免日後數錯，佢會請秘書處檢討數人方法。而流會罪魁禍首（或者有人會覺得係英雄）秘書處嘅秘書長陳維安其後向議員發信致歉，話會確保點算人數準確。今次仍喺會議廳嘅泛民議員只有莫乃光一人，其餘都係建制派。
在場36人中，到底邊位議員被當透明？據現場議員話，最後一刻進入會議廳係田北辰同馬逢國，田最後成功出現喺秘書處嘅35人名單上，馬逢國就榜上無名，以此推算，田北辰被當透明嘅嫌疑相當大，馬逢國直情被當冇到。有目擊人士話，馬逢國係喺鐘聲一過之後由側門內進，理應當佢冇到。
社民連長毛事後於會議廳外振臂歡呼，佢話流會係同梁振英向曾鈺成施壓要求立法會開會有關，如今適得其反，「叫做揠苗助長。」工聯會黃國健重申，仍覺得政府撤回法例係明智決定，認為長此下去，「久守必失」喎。
李八方
mailto:[email protected]