壯陽藥是第幾級危險品？俗稱偉哥的，原來屋企放着「睇門口」，隨時躺着中槍。好好醜醜，各位宅男，盡快執行「斷捨離」生活哲學，從速查找櫃桶，將「可以聯想」的物件甩手，尤其下列物事：
1，高牆與雞蛋。真係見過高牆的差佬有多少？拆你屋衝入來忽然見到你自製的劏房，那四堵假牆還放了雞蛋，咁串，串過魚蛋！你說有乜後果？無謂博，即刻清牆！炒蛋！
2，清潔劑。你知但唔保證你阿媽知道清潔劑有幾大劑！別問什麼是聚乙二醇、二氧化硅，丟晒廁所那些好幫手！環保酵素已經被扣「武器庫」帽子，更加唔留得。咁洗邋遢用什麼架生？哎，唯有等明年維園年宵，大學生自製賀年梁特頭像鮑魚刷、梁特屎忽百潔布、梁特黑面除霉胡椒玻璃水……etc。
3，書。遺憾你永遠無機會超越吳得掂，假如你一個月睇三十本書，實有機會中禁書！
4，最後丟口罩！丟頭盔！丟絲襪！丟大碼避孕套！（邊啱香港仔尺寸，仲唔係用來蒙面笠頭？）