成班中環金融界人物坐埋吃飯，互相恭喜發財，適逢電視新聞播出中國工商銀行馬德里分行被西班牙警察搜查嘅消息，大家當然議論紛紛。左派銀行人士話「好破壞國家形象」。又係幾冇面嘅，ICBC係全世界賺錢最多嘅銀行，在西班牙被捉着洗黑錢把柄，適逢西班牙政府嚴打逃稅，連球王美斯都被查到冇晒癮，呢次捉住ICBC呢隻肥羊，大可以向美國效法，罰款幾十億美元，幫助吓庫房。
幾十年前銀行賺錢容易，大把東南亞國家政客、富豪坐飛機來港，住在文華酒店或希爾頓酒店，行過隔籬嘅美資銀行或匯豐渣打，係咁意存入一兩個占士邦喼嘅美元現鈔，跟住轉撥新加坡ACU戶口，第二日或第三日在香港嘆過佳餚靚茶之後，就回國去也。銀行從中賺費用（fees），輕鬆到不得了。
自從有咗911，美國為咗反恐，全力追查打擊恐怖組織之金錢來源及移動途徑，大力抽緊「反洗黑錢」（Anti-Money Laundering，簡稱AML）法規，亦向其他地區施壓，訂立相似法例，葉劉淑儀做保安局局長之時，就緊跟美國行動，AML條例寫得非常嚴苛，跟住又有2008金融海嘯，美國為咗調查銀行成為逃稅、避稅中介人嘅角色，動輒以AML打壓銀行兼罰重金，於是乎，今日銀行界受到空前嚴密嘅監管，合規成本成為負擔。有咗馬德里ICBC案例，香港金管局相信會更不放鬆。
賓架S話香港好難發生馬德里ICBC之事。佢話：「左丁山你開個戶口，我都要問到你口啞先。梁特首口口聲聲講一帶一路商機，我就話即使有機，我地銀行都會趕走佢，好簡單箒，若有任何大陸富豪（莫講烏茲別克有錢人）來開戶口，根據KYC（know your customer）及AML規定，我地要問佢嘅錢從何來，點解會有幾十億元未開頭，佢發達咗幾多年，靠乜發達，如何累積財富，當正我係廉記，佢係貪官咁，審問佢嘅財富來源，對方發老脾嘅話，咪唔做生意囉，不做不錯吖嘛。」賓架S又講，有中介人帶內地某著名城市富豪到銀行開戶口，借錢，話在內地擁有地產幾百億，以為開戶借幾千萬話咁易。賓架S親自接見，一句話就回絕，呢句話就係：「Sorry, we don't know you」，乜乜首富呀，唔該詳釋富有發達之路，首富怕被人質問，調頭就走。將來開發一帶一路生意，應該係中國內地銀行嘅天下，本港及外資銀行，點搞得掂KYC與AML兩關卡呀。
（作者按：本欄於2月18日提及伍展邦律師，寫稿前曾上Google搜尋，打下伍展邦三字，即接引至范紀羅江律師行網頁（ http://www.fclklaw.com.hk ），有伍展邦的個人Profile。該律師行於2月23日來電郵，澄清伍展邦已於2014年10月31日離職，現於鄧王周廖成利律師行任職。謹此更正。）