民建聯「博士級」議員、立法會資訊科技及廣播事務委員會主席葛珮帆，噚日喺財政預算案公佈後四粒鐘，就喺自己fb專頁，上載一份紫色封面嘅預算案資料，留言話：「今（噚）日財政預算案重點一覽如下。大家點睇？」並隨post附上八幅預算案圖片（圖）。葛博士此post一出，即時為大批網民帶來歡樂，有網民讚葛博士原來鍾意玩懷舊，因為呢份預算案，其實係上年產物！
葛博士唔知係咪見網民反應太好，及後竟悄悄刪post，上載番今年預算案，旋即惹來網民不滿。有網民慨嘆「咁快又一年嘞」、「感覺好似坐咗一年時光機咁」，仲肯定今次都係「人為」錯誤喎！