繼《分手100次》之後，鄭伊健與周秀娜（Chrissie ）早前再結片緣，在下月上映的新戲《iGirl 夢情人》內， Chrissie化身靚女機械人，伊健則成為她的用家，譜出一段機械人之戀。現實中，二人原來有些想法也近似，對愛情只求簡單，不求動地驚天， 平淡細微的事同樣足夠令他們窩心快樂。
統籌：林妙萍
撰文及造型：陳蔚渝
攝影：周樂恒
化妝：Shuen Kong of WiLLWong（鄭伊健）/ Circle Cheung of ndnco.co（周秀娜）
髮型：Jacky Ma of Headquarters（鄭伊健）/Amber Tse of Alcgemy（周秀娜）
鄭伊健在新戲內飾演被女友怒飛而網購iGirl（Chrissie 飾）的香港男生，二人都表示對機械人有興趣，伊健話：「始終男仔會覺得係買咗一個科技，買番嚟玩吓，感情唔會有損傷，不過真係拍拖就可能有損傷。」
追求簡單愛情
二人對感情其實也追求簡單，單身的Chrissie 覺得有愛最重要，「鍾意一個人嘅話，同對方一齊做乜都好開心，可能只係食餐飯，又或者一件細微嘅事，都會覺得好窩心。」與蒙嘉慧結婚兩年多的伊健同樣怕煩，「總之越簡單嘅嘢越容易記得，唔使太複雜，好多嘢都係自自然然，正如節日一樣，平時喺咁意已經做咗，咁樣已經好開心，好過節日先去做。」
鄭伊健 用心再唱我的歌
電影《古惑仔》 今年二十周年，絕對稱得上是經典，鄭伊健飾演的陳浩南至今仍然深入民心，戲內的一班古惑仔雖然已經變了古惑佬，但就人氣依然，五子合體的《歲月友情演唱會》更是開足幾年，「好驚訝，冇諗過一套戲廿年之後可以產生咁多嘢。」問到會否再次回到紅館，「5個人搞演唱會其實唔容易，若然可以將成件事拆散再諗過，都好好玩。」在今年完成演唱會之後，五兄弟7、8月便會開拍新片，「同錢嘉樂拍離不開有動作，一啲飛車場面都係少不免，究竟5個人會點樣飛就到時會知。」
近年伊健主要都是與古惑仔合體搵銀，不過對音樂仍然大有諗法，想做唱片，要數伊健的經典hit歌絕對係一大籮，大家隨口都能說出《動地驚天愛戀過》 ，又或者《感激我遇見》，不過伊健就覺得一首《我的歌》最代表到自己，「首歌本身係講創作人，當時Wyman填吓填吓詞，就話好難填，咁不如講歌手，呢隻歌最初好多人都會批評我邊有資格唱，覺得我呢啲資歷尚淺嘅死𡃁仔唱咩我的歌，我老師羅文佢都好鍾意呢首歌，佢喺自己演唱會最後都係唱呢首歌，所以對我好有意思，同埋我𠵱家呢個年資應該都可以唱呢首歌。」
周秀娜 女人拚命會勝利
由模特兒出身的Chrissie ，轉眼已經跳到大螢幕多年，電影劇集一套接一套，在完成新戲《iGirl 夢情人》的宣傳工作之後，緊接會開拍另一套新戲，其自家內衣品牌Laanaa 今年年頭亦成功在內地開設首間專門店。事實證明，女人靠自己一樣可以是人生勝利者。
一心專注拍戲
除了拍戲，Chrissie 早前亦有接拍內地網劇《美女公寓》，不過相比之下愛拍戲多於拍劇，「兩個節奏唔同，拍劇感受唔同，可能一個角色可以有好多集，你可以拖長嚟做，但係電影唔同，我鍾意電影樣樣嘢都好細緻，所有情感都要好精準，因為時間性好短，可能只係得一個鐘，或者兩個鐘去講一個故事。」既要拍戲，又要兼顧內衣品牌生意，不過Chrissie 就表明不愛一心二用，「我其實比較花多啲時間喺拍戲上面，比較鍾意一個時段就專心去做一樣嘢，如果我鍾意嗰樣嘢我就會專心做好佢，投入去做嗰件事。如果拍緊戲嗰一、兩個月，同事、partner知道，佢哋本身有佢哋崗位同專業，咁佢哋就會打理，今年年頭已經開始有自己內衣品牌喺深圳開舖，所有嘢都好smooth，好順利。」
為品牌再開舖
品牌成功打入內地市場，證明Chrissie 甚有生意頭腦，不過就未想投資新項目，反而想再開分店，「目標係做其他地方嘅分店，例如東南亞地方，自己平時都成日去馬來西亞或者新加坡，反而想專心搞好品牌先，我自己好open，如果有鍾意嘅牌子都可以合作，乜嘢產品都可以嘗試，只要大家都鍾意。」
更多精采時尚內容，盡在 http://add.appledaily.com 。