這晚谷戰三T大彩池，若然當潘頓冇到，唔使旨意有錢收，佢老哥第五場贏完蘇廐「金碧旺旺」後，士氣返晒嚟，第六場一班1200米，以方廐「控制者」再下一城，一手包辦第五口孖寶，後駒單Win及組合獨贏A1，分別派71.5及28.5元，騎練及馬匹成功衛冕跑馬地錦標。
六歲「控制者」出自本港拍賣會，身價500萬，呢場133磅後上敲響今季勝鼓，姿態大把在手，至今已七捷，累積獎金870萬，馬主佔609萬已回本。此駒已報名下月5日杜拜泥地1200米三級賽北風錦標及下月26日泥地1200米一級賽杜拜金莎軒錦標，勝出今場後大大提升獲選參賽機會。
今場「真先生」配楊明綸衝擊跑馬地錦標，後上未竟全功只得亞軍，第三名乃史卓豐座騎「飛龍駒」，第四名係田泰安「神舟小子」，四重彩派一萬四千幾。
方嘉柏表示「控制者」今仗負重磅勝出難度甚高，牠是匹很可愛忠心準繩的馬，只合谷草和泥地，田草威力大減，只可惜今季餘下已沒有合適賽程，希望今仗贏馬後可獲杜拜馬會邀請，遠征金莎軒錦標。方嘉柏謂如果不獲邀請，香港又沒有合適賽程，可能被迫安排牠退役，運往美國繼續競賽生涯。