「唔怕神一樣嘅對手，只怕豬一樣嘅隊友」，阿仙奴門將施治保持對巴塞隆拿前鋒美斯六場545分鐘不失球紀錄，周二終於斷纜，更加打孖嚟失夠兩球。阿仙奴歐聯16強首回合以0:2輸波，出線機會渺茫，施治只好怪身邊隊友係梅迪薩卡、法米尼，唔係泰利、林柏特。廠迷嬲到爆，連英國前奧運七項全能銅牌得主索菲頓（Kelly Sotherton）都嬲到掟爛電視機。
雖然巴塞貴為上年三冠王，阿仙奴牌面輸蝕晒，不過兵工廠之前兩次喺阿聯酋球場主場對巴塞都保持不敗㗎，今次形勢都唔係咁差，好可惜阿歷士張伯倫同基奧特都錯失門前建功機會，曾效力過阿仙奴同巴塞嘅亨利，就一早放風話阿仙奴最大威脅就係奧斯爾，巴塞亦都醒水，結果全場將奧斯爾凍結。
法米尼上陣即派膠
上半場悠悠閒閒嘅巴塞，下半場叫做加快節奏，就搶番唔少主動權，71分鐘一次反擊，尼馬左路傳中，美斯冷靜咁先呃一呃施治後，先至慢慢射入空門，就係咁簡單喺呢位捷克門將身上取得首個入球；呢球失波同阿仙奴中堅梅迪薩卡同哥斯尼失位有好大關係。正所謂「豬」開有條路，法米尼82分鐘入替高基連，上陣一分鐘就出事，禁區內踢跌美斯，球證想唔判12碼都唔得啦，結果美斯親自主射12碼，幫巴塞贏到2:0，晉級八強機會就高唱入雲。施治06、09同12年三屆歐聯淘汰賽代表車仔鬥巴塞，假假哋都有一勝四和一負佳績，而且都冇畀美斯射入過，今次失波之餘仲失夠兩球，就真係情何以堪。
屋漏偏逢連夜雨，阿仙奴仲有張伯倫下半場傷出，對餘下英超及英足盃爭霸之路亦都有影響，領隊雲格賽後就講：「其實我哋未失波前都有好多機會，只係把握唔到，第一個失球球員都有好多機會阻止對手推進，結果做唔到。巴塞不能否認係世界最佳，不過就算機會渺茫，我都唔打算放棄次回合。」
索菲頓嬲豬遙控當標槍
「老馬有火」嘅雲格暗示賽後喺更衣室就省過班球員，同樣好火嘅就係阿仙奴球迷、英國奧運銅牌選手索菲頓。39歲嘅索菲頓04年雅典奧運拎銅牌，佢睇到法米尼輸12碼，就嬲到用遙控飛去個螢幕度，直插入去。佢仲自嘲有呢個手法玩標槍可以贏多200分，唔知阿仙奴會唔會覺得唔好意思，送番部新機畀佢呢？