周二NBA常規賽上演「狀元大戰」，巫師憑禾爾（John Wall）交出「大三元」，以109:89擊敗塘鵝；呢位2010年狀元無論數據定成績，都贏晒2012年狀元安東尼戴維斯（Anthony Davis、AD）。
巫師自明星賽後四場贏足三場，而且場場勝仗都令對手得分低於90，表現令人眼前一亮。當家球星禾爾今場表現勁搶鏡，貢獻16分、11助攻同12籃板，呢場已經係佢繼月初迎戰76人後，今季第二次拎到「大三元」；隊友J杜尼（Jared Dudley）亦功不可沒，佢除咗射入六個三分波拎到18分，仲幫球隊守死塘鵝主將AD：「今場我哋不斷向AD施壓，令佢喺場上嘅每一秒都覺得唔自在。」
AD遭夾擊得九分
眼見命中率得34.9%，仲要所有正選都係個位數得分，塘鵝教練根度爾（Alvin Gentry）話唔可以過份依賴AD：「佢全日都俾兩個人包夾，其他球員要幫吓手分擔得分責任。」AD上場作客活塞豪取完59分，今場就突然啞火得九分，亦係佢今季首次上陣超過20分鐘但攞唔到雙位數得分：「今場我俾對方夾擊，令我搵唔到進攻節奏；有時我喺攻勢甚至掂唔到波。」