現在大家討論的早已不是雲高爾的「去留問題」，而是直截了當談論下季「由誰接任」。其實從冬季轉會窗操作已見端倪：前任莫耶斯衰極，季中管理層都出錢買咗個桑馬達；今季成績同樣欠佳，一月份管理層卻仍一毛不拔。除因季初已使咗一大筆，最主要原因相信是根本已對雲帥失去信任，寧願留番個錢畀下任領隊好過。
接任人選，各大傳媒、甚至莫拉堤家姐日前都爆料話：「肯定係摩連奴（圖）！」摩佬確係贏過很多冠軍，但自於波圖成名後四次離隊，只在波圖及國米兩次是「贏住走」；在皇馬及兩次在車仔均與班主或球員不歡而散。高壓手段有時的確能達成目標，卻非萬試萬靈；長遠計，懂得懷柔似乎才是長期穩定之道，如此一來，比歷連尼會否更合紅魔？
比歷連尼有名叫「工程師」，可能差點霸氣，但其低調穩健作風，除了懂調校好隊波，「處理」老闆、傳媒同球迷亦冇得彈；況且亦曾贏過英超冠軍，對英球壇瞭如指掌；而且從同市死敵曼城過檔，亦很有噱頭，揀比帥可謂一舉數得。講到尾，剛送走一個鐵腕派的雲高爾，若旋即又請來另一個鐵腕摩佬，是否明智？就好像揀特首：某屆找了個超級大鷹派，搞到滿城風雨民怨爆燈；下一屆揀番個鴿派一點的，搞番好啲官民關係先，是基本常識吧？
方栢翹
now足球評述員