本地甲一籃壇再傳喜訊！效力南華多年嘅控衞羅意庭，將於今年5月21日同相戀13年嘅勞姓女友（Ar Lo）共諧連理，結束愛情長跑。
喺05年「上山」效力南華嘅羅意庭接受電話訪問嗰陣透露：「始終係人生大事，心情當然會好緊張，不過由於好早已經開始籌備，所以現時嘅準備工夫已經差唔多完成，到時會喺尖沙嘴朗廷酒店擺酒，招待好友。」
曾經征戰中國籃球聯賽（CBA）多年嘅阿庭亦表示，無論如何都會先完成即將展開嘅籃球賽季，之後至會前往度蜜月，但暫時未諗過蜜月旅行目的地。
與未婚妻青梅竹馬
現年28歲嘅羅意庭早喺當年效力新青聯嘅時候已同Ar Lo拍拖，佢哋絕對稱得上係青梅竹馬。2010年開始，阿庭北上效力CBA，同女友雖經常分隔兩地，不過無損感情。阿庭喺前年4月26日同女友、好友喺泰國旅行嗰陣求婚成功，佢表示同女友早有共識會喺呢一、兩年拉埋天窗，所以求婚成功後已即刻着手籌備。