元宵節啱啱過，湯圓都未食完就食月餅？《立場新聞》創辦人蔡東豪噚日出席證監會監管論壇，無厘頭問主持小組討論嘅證監會主席唐家成：「你舊年收到幾多盒月餅？」唐家成認真mode回答：「唔係好多，我多數退番畀人。」蔡東豪即刻借題發揮，叫唐家成收到嘉麟樓月餅就千祈唔好送人喇，事關佢哋嘅月餅出咗名後，排晒長龍，一盒難求；而好嘢自然有人欣賞，認為半島大有條件將月餅價錢賣貴一倍都仲得。
講咁多，其實蔡東豪係想用月餅來做比喻，香港市場出咗名監管水平優質，冇理由因為遷就龐大的中國市場，就自貶身價，降低自己水準，嘉麟樓月餅都唔會加大生產賣到一街都係啦！反而香港應該要做嘅，係吊高嚟賣，咁先顯得矜貴。用月餅「勸諫」唐家成，全場會心微笑，蔡生果然口才了得。