近年日本動畫傾向以劇情為主，不再賣弄機械人變身合體、超人出「必殺死光」打怪獸，但華華就覺得，呢啲「熱血卡通片」始終會有一班死忠擁躉，尤其係細佬仔同埋嗰班日日放學就開電視機追睇卡通嘅七八十後男生。
算得係合體機器人「始祖」嘅《百獸王》，早喺1981年就有得睇，講五隻機械獅子合體變巨型機械人打怪物，之後好多乜乜戰隊劇情路線同呢套劇差唔多，不過《百獸王》身世就慘啲，俾日本製作公司賣去美國，最近俾夢工場（DreamWorks Animation）買咗，仲同Netflix合作重製《百獸王》卡通。
有Netflix同DreamWorks「照住」，相信質素會有一定保證，仲有香港代表彩星玩具（869）為新版《百獸王》製作一系列玩具，預計明年春季推出，到時會唔會有人炒模型呢？